Ginakalipay sang amay ni Nicus Balagosa ang balita nga ila nabaton kun sa diin gingrant sang Bacolod City Prosecutor’s Office ang ila ginfile nga motion for reconsideration.
Madumduman nga ginsulong sa sulod sang kwarto kag ang Grade 11 student nga si Nicus Balagosa sang ginpatay sa atubang sang iya mga ginikanan Hunyo 2 sa Granada Heights, Barangay Granada, Bacolod City.
Hugot nga ginapanindugan sang pamilya sang biktima nga ang suspect amo si Carlito “Dondon” Tongho, ang amay sang 16 anyos nga babayi nga gina-alegar ginlugos sang mga abyan ni Nicus, utod sini kag tatlo ka iban pa.
Apang ang kaso ang ginbasura sang City Prosecutor’s Office sang Agosto 5 bangod sa rasun nga may tabon ang nawong sang suspect nga nakita sa CCTV footage.
Ang pamilya Balagosa ang gilayon man nga nagfile sang motion for reconsideration sang Agosto 9.
Sa interview sang Bombo Radyo Bacolod kag Eric Balagosa, amay ni Nicus, nangin emosyonal ini matapos nga mahibaluan nga gingrant sang korte ang ginfile nila nga motion for reconsideration sa kaso sang ila bata.
Suno sa amay nga Balagosa, wala gid sila ginpabay-an sang Ginoo kag nagmag-an na ang kabug-at nga ila nabatyagan.
Dako man ang pagpasalamat sini sa mga kapulisan kag ilabi na sa alkalde sang ciudad nga nagbulig sa ila agud nga magrant ang ginfile nga motion for reconsideration.
Ginpahayag man sini nga ginsend sang iya asawa ang live sang alkalde sa social media kag didto sini nakumpirmar nga matuod ang nabaton sini nga impormasyon.
Bangud sini, una na nga ginpahayag ni Bacolod City Police Office Director Police Col. Joeresty Coronica nga ginahulat nalang nila nga ipagwa sang korte ang warrant of arrest, apang wala pa mahibaluan kun san-o bangud ini ang may labayan pa nga proeso.
Ginpahayag naman ni Bacolod City Mayor Alfredo ‘Albee’ Benitez nga kun yara na ang warrant of arrest may patigayunon nga manhunt operation agud nga madasig nga madakpan ang mga suspetsado.
