Ginpahayag sang chairperson sang committee on education sang Sangguniang Panlungsod sang ciudad sang Bacolod nga subong pa lamang natabo nga nahatag sang timprano ang libre nga school supplies sa mga estudyante.
Suno kay Councilor Al Victor Espino, chairperson sang Committee on Education sang Sangguniang Panlungsod, humalin sang nagpungko ini bilang konsehal subong pa lamang natabo nga wala nadelay ang pagpanghatag sang mga school supplies.
Nagpangayo man ini sang pasensya sa natabo sang nakaligad nga tuig nga may yara sang kakulangan sang napanagtag nga school supplies bangod nga wala naantisipar ang pagmahal sang presyo sang balaklon.
Apang sa karun, ila na gindoble ang budget kun sa diin masobra sa P400 ang budget nga gintalana sa kada estudyante nga mas mataas kun ikumpara sa P200 nga budget per student sang nakaligad.
Dugang pa sini, kun sadto ang mga manunudlo kag principal ang nagakuha sang school supplies, sa karun mismo ang ciudad na ang magadul-ong sini sa tagsa ka mga buluthuan.
