Preparado na ang Department of Education (DepEd) Regional Office 6 sa nagahilapit nga Western Visayas Regional Athletic Association (WVRAA) Meet 2024.
Sa interview sang Bombo Radyo Bacolod kay Hernani Escullar Jr., public information officer sa DepEd Region 6, sila ang nakapatigayon na sang series of meetings humalin palang sang Marso agud hitsuon ang preparasyon sa mga mahimo pangatubangon nga mga problema partikular na sa host province, ang DepEd Division of Negros Occidental kag Bacolod City.
Nakaligad nga semana, nagpadulong ang Schools Division Superintendent sa Negro Occidental kag Bacolod City para sa Quarterly meeting kun sa diin gintsekyar man sang mga ini ang mga billeting schools kasubong man ang supply sang tubig.
Nagmeeting naman ang mga Technical Officials nakaligad nga semana nga nagseguro nga preparado na ang tanan nga playing venue.
Kalakip man sa ginseguro ang first aid responders kag mga medical personnel para sa aktibidad.
Kaangay sa pagpatigayon sang WVRAA 2023 sa Aklan, ginkonsiderar man nila ang safety sang mga atleta karun nga tuman ang kainiton.
Bangod sini, gin-adjust ang oras sang mga aktibidad kun sa diin wala sang outdoor games halin alas-9:00 sa aga tubtob alas-2:00 sa hapon.
Samtang tayuyon naman sa bilog nga adlaw ang indoor games partikular na kun well ventilated man ang mga game venues.
Ang mga billeting schools ang lunsay yara man sa sulod sang Bacolod City samtang ang mga pahampang ang mayorya patigayunon sa Panaad Park and Stadium kag iban pa nga area sa Bacolod City kag mga katupad nga banwa kag ciudad, kun sa diin ang pinakamalayo lamang nga playing venue amo ang ciudad sang San Carlos, nga ginrequest ni Negros Occidental Governor Eugenio Jose “Bong” Lacson nga patigayunan sang long tennis.
Suno diri, sa estimate magadangat sa 4,756 ang delegates gikan sa anom ka probinsya nga magapartisipar.
Ini ang ginalakipan sang 540 ka mga atleta; 671 ka coaches, assistant coaches kag chaperones gikan sa kada probinsya ukon kabug-usan nga 4,026 kag dugangan pa sang 730 ka Technical Working Group members kag mnga opisyales sa DepEd Regional office.
Apang paathag ni Escullar nga ini ang maximum estimate lamang kag mahimo mas manubo ang numero sang delegates bangod indi tanan nga pahampang may partisipante ang kada probinsya.
