BACOLOD CITY-Ginakabig sang Bacolod City Police Office (BCPO) nga maayo nga development ang pagkadakop sa pinuno sang Criminal Investigation and Detection Group (CIDG) – Bacolod City sa isa ka entrapment operation kahapon bangud sa gina-alegar pagpangilkil.
Madumduman nga nadakpan si Police Major Melvin Madrona sa ginpatigayon nga entrapment operation sang gintingob nga pwersa sang Philippine National Police Integrity Monitoring Enforcement Group (IMEG) Visayas Field Unit, Special Action Force kag Negros Occidental Police Provincial Office (NOPPO) sa gina-alegar extortion sa sulod sang bulangan sa Purok Guanzon, Barangay Mansilingan ciudad sang Bacolod kahapon.
Sa interview sang Bombo Radyo kay BCPO Spokesperson Police Lieutenant Colonel Ariel Pico, ginpahayag sini nga makabig nga isa ka maayo nga development ang natabo bangud nagapakita ini nga seryoso ang kampanya sang gobyerno tuhoy sa internal cleansing.
Suno kay Pico, nagapakita ini nga wala sang exemption sa mga kapulisan bangud kun madakpan nga naga-ubra sang illegal, apisar nga mataas ang ranggo, indi ini makaluwas.
Aminado man ang spokesperson nga dako ini nga tampa sa organisasyon kag indi malikawan nga igeneralize sang publiko ang panulok sa mga pulis apang suno sa iya, dapat kabigun ini nga challenge sang mga pulis nga mag-ubra sang tampad iliba na nga prayoridad kag istrikto nga ginapatuman ni Philippine National Police Chief General Archie Gamboa ang internal cleansing program.
