Ginpahayag sang pinuno sang Traffic Management Unit sang Bacolod City Police Office nga aksidente ang natabo nga pagkahulog sang konduktor sa nagadalagan nga modernized jeepney.
Ang biktima ang ginkilala kay Reynan Bantilan, 22-anyos, single kag residente sang brgy Mansilingan samtang ang driver naman amo si Francis Belicena, 40 anyos sang ciudad sang Talisay.
Sa interview sang Bombo Radyo Bacolod kay Police Lt. Col. Ramel Sarona, sang Marso 4, nagabyahe ang modernized jeepney sang RSJ lines nga may routa nga Homesite – Central Market.
Kapin alas-6:00 sang gab-i samtang nagaduhol sang ticket kag sinsilyo si Bantilan nagatindog ini malapit sa pwertahan nga sirado pa.
Apang, may isa ka pasahero nga naghambal nga manaog kag ginbuksan ni Belicena ang pwertahan.
May gindaho naman si Bantilan sa isa ka pasahero kag pagbalik sini sandig, wala sini nanotisyaran nga nakabukas na ang pwertahan.
Nadagdag si Bantila samtang nagadalagan ang modernized jeep kag ini ang nagtupa nga nagakaya gani ini ang nasamaran sa likod sang ulo.
Gindala ini sa ospital kun sa diin siya ang nacomatose kag ginbawian sang kabuhi kahapon sang hapon.
Pahayag ni Sarona, gindetain si Belicena sa Police Station 4 apang ginrelease matapos ang reglementary period.
Tuman naman ang kasubo sang amay sang konduktor nga nadagdag sa gadalagan nga modernized jeepney sa pagkapatay sang iya 22 anyos nga bata.
Sa interview sang Bombo Radyo kay Hernani Sigorado, amay ni Reynan Bantilan, sang Marso 4, gintawagan ini sang kaupod ni Reynan sa trabaho kag ginpahibalo sang natabo.
Dali-dali nga nagpadulong sa ospital ang iya isa ka bata kag sang nagpadulong man ini sa ospital, nakita sini si Reynan nga nacomatose.
Suno sa amay, nagtulo ang luha sini sa sakit nga nabatyagan sa natabo sa iya bata nga sa pagkilala sini mabuot nga bata nga kun ginasaway nagahipos lang kag wala nagasabat-sabat sa ginikanan.
Nagapati man sila nga aksidente lamang ang natabo.
