Naumpisahan na ang pagpangkakas sa mga pinta sa bato sa suba sa Barangay Minoyan, Murcia.
Ang Nursery 1 Incorporated ang ginapanag-iyahan sang Russian National nga si Ivan Orlov, nga may-ara sang Bacolodnon nga live-in partner.
Sa interview sang Bombo Radyo Bacolod sa caretaker nga si Elvie Evangelio, nakaligad pa nga semana gin-umpisahan ang pagpangkiskis sa mga bato apang nagalab-ot tubtob sa duha ka oras ang pagkiskis sa isa ka bato lamang.
Bangod nga madugay ang pagtrabaho, nagdesisyon na lamang ang tag-iya nga magprocure sang pressure water machines.
Suno diri, ginatinguhaan nila sa karun nga mapabalik sa normal ang natural feature sang mga bato. Samtang, nagpanawagan ang pinuno sa Provincial Environment and Natural Resources Office sa Negros Occidental sa tanan nga luyag mag-invest sa eco tourism nga indi pagtandugon ang natural beauty sang environment.
Sa interview sang Bombo Radyo Bacolod kay PENRO Head Engr. Joan Nathaniel Gerangaya, yara sa Punong Barangay sang Barangay Minoyan, Murcia ang authority para magpasaka sang kaso sa paglapas sa RA 3042 ukon Anti- Vandalism Act of 2009 sa Russian National nga si Ivan Orlov nga nagpapinta sang mga bato sa suba.
Apang, antes nga mapasakaan sang kaso si Orlov, siya ang dapat nga mag-atubang anay sa baranagay.
Sa karun, si Orlov ang yara pa sa China kag ginalauman nga makapauli subong nga semana.
Panugyan ni Gerangaya sa tanan nga luyag mag-invest sa eco tourism nga indi na pagtandugon ang natural beauty sang environment agud mag-ingganyo sang turista.
