Ginpahayag sang pinuno sang City Drug Enforcement Unit nga dako nga buhin sa supply sang druga ang pagkumpiskar sa kapin 1,300 grams sang illegal nga druga nga natalana isupply sa Kabankalan City para sa Sinulog Festival.
Sa ginpatigayon nga drug buybust operation sang Bacolod City Drug Enforcement Unit (CDEU) sa Barangay Mandalagan, Bacolod City, kagab-i, nadakpan sanday alyas “Tata/Ramyr,” 53-anyos, lalaki, wala sang asawa, wala sang trabaho kag residente sang Brgy. Mandalagan, Bacolod City; kag si alyas Anthony, 45-anyos, lalaki, wala sang asawa, wala sang trabaho kag residente sang Purok Paraiso, Brgy. Hilamonan, Kabankalan City, Negros Occidental.
Nakumpiskar sa duha ang suspected shabu nga ginabanta nagabug-at sang 1,300 grams nga may standard drug price nga P8,840,000.
Sa interview sang Bombo Radyo Bacolod kay Police Lt Col. Antonio Benitez, pinuno sang City Drug Enforcement Unit, nagdangat sa anum ka bulan ang ila nga monitoring sa duha bangod sa tuman ka hugot sang security sa subdivision.
Suno diri, si Tata ikatatlo ka beses na sa karun nga mapreso samtang si Anthony naman ang ikaduha ka beses na nga mapreso subong.
Suno kay Benitez, bangod sa eksperyensya sang duha nga mapreso, nagahimo man sila sang plano agud indi dali-dali nga madakpan.
Indi lamang sa Kabankalan City may transaction sa pagsupply si Tata apang siya man ang nagasupply sa Bacolod City, La Carlota City, Hinigaran, Binalbagan kag Himamaylan City.
Ginakabig nga High Value Individual si Tata kasubong man si Anthony bangod miyembro ini sang Bugalon drug group sa Kabankalan City.
Nahibaloan naman nga nagikan sa Mindanao ang supply sang droga santo sa pag-ako ni Tata.
