Nagpatigayon na sang spraying sang insecticide si Negros Occidental 5th District Representative Dino Yulo sa mga katubuhan nga nahalitan sang pagdagsa sang army worms.
Madumduman nga sa una nga assessment, ang apektado ang ginalakipan sang Barangay Cabadiangan sa ciudad sang Himamaylan, Brgy. Santol sa banwa sang Binalbagan kag pila ka mga barangay sa banwa sang Isabela.
Sa interview sang Bombo Radyo Bacolod kay Yulo, madasig ang paglapta sang mga ulod gani nagdamo pa ang mga lugar nga nahalitan.
Bangod sa madasig nga paglakat sang kahalitan, pahayag ni Yulo nga indi na sila makahulat pa gani naghimo na ini sang tikang upod sa Sugar Regulatory Administration (SRA) kag Negros Occidental Provincial Agriculture Office.
Panawagan sini nga imonitor ang hulag sang army worms indi lamang sa mga local government units sa 5th District kasubong man sa iban nga mga distrito.
Kalabanan sa mga gin-atake sang army worms ang mga katubuhan kag maisan.
Suno kay Yulo, ini ang dapat matapna ilabi na nga crucial sa karun ang industriya sang kalamay.
Nagapanawagan man ang kongresista sa mga private chemical companies nga makig-angot sa ila kag mag-upod sa lihok.
Panindugan ni Yulo nga dapat gulpyada ang himuon nga tikang bangod kun amat-amat, magasaylo lamang sa iban nga area ang army worms.
Panawagan sini sa mga kaiping nga mga Barangay nga nahalitan naman sang army worms nga magpahibalo agud nga sila ang maka-obra sang zone plan kag ma-isolate ang mga peste agud indi na maglapta.
