Ginpahanumdom sang Bacolod City Disaster Risk Reduction and Management Office ang publiko nga masami sundon ang ‘get out, stay out’ nga principle sa tion sang sunog sa isa ka building.
Ini ang kasunod sang sunog sa Java Pension House sa corner Locsin-Gonzaga Streets Martes sang kaagahon kun sa diin anom ka mga persona ang napatay kag ginapatihan nga nasuffocate.
Sa interview sang Bombo Radyo kay Bacolod City CDRRMO Head Aaron Bais, nagpahanumdum ini sa publiko nga gilayon nga maggwa sa building sa tion nga ini ang masunog, magsinggit sang “sunog” agud mapabalo ang mga kaingod kag magtawag sa emergency hotlines.
Gindumilian man sang CDRRMO Head ang paggamit sang elevator bangud dako ang posibilidad nga ma-trap.
Ginarekomendar man sini nga magkamang pagwa sa building agud makakuha sang hangin bangud suno sa iya, ang utok ang makasustener lang sang apat tubtob napulo ka minuto nga wala sang oxygen.
Sa tion sang sunog, suno sa iya, kinahanglan nga mangita sang secondary escape routes kag indi pag-abrihan ang puertahan bangud may posibilidad nga masugat-an ang kalayo.
Sa tion nga matrap sa kwarto, suno kay Bais, kinahanglan nga tabunan sang basa nga towel ang idalum sang puertahan agud nga indi makasulod ang aso.
Gindugang niya man nga kun magsulod sa isa ka building, kinahanglan nga hibaluon ang mga exit routes agud makabalo kun diin maagi sa tion sang indi maayo nga insidente.
Nagpahanumdum man ini nga mas kinahanglan nga iprayoridad ang kaugalingon labaw sa mga kagamitan bangud suno sa iya, ang seguridad ang dapat nga unahon sa tion sang emergency.
Wala man ginarekomendar sang Bacolod CDRRMO ang pagtinir sa banyo ukon comfort room sa tion sang sunog sa isa ka building ukon balay.
Suno kay Bais, ginadumilian sini ang publiko nga magtinir sa banyo ukon comfort room sa tion sang sunog sa isa ka building ukon balay bangud dako ang posibilidad nga matrap diri kag indi na makagwa.
Suno kay Bais, apisar nga may yara sang supply sang tubig sa banyo, may posibilidad nga mag-init ang steel nga tubo kag masunog naman ini kun plastic ang pipe tungod sa kalayo kag maubusan sa gihapon sang tubig.
Suno sa iya, maapektuhan sa gihapon kun magtinir sa banyo bangud sa aso kag imbis nga makabulig ang pagtinir diri, kaanggid lang nga ginpriso ang kaugalingon.
Nagpahanumdum man ang CDRRMO Head nga ang paggwa sa building ukon balay ang pinakauna nga objective.
