Nangin emosyonal ang bata sang benepisyaryo sang wheelchair sang Bombo Medico 2018 matapos personal ini nga gindul-ong sang team sang Bombo Radyo Bacolod sa ila puluy-an sa ciudad sang Bago.
Si Jocelyn Bitco Trono, 53-anyos sang Purok Kanlaon, Brgy. Don Jorge L. Araneta, Bago City ang una na nga ginpili nga mangin benepisyaryo sang wheelchair nga ginhatag sang Rotary Club of Bacolod North kag natalana niya ini kuntani nga batunon tinalikdan nga Hulyo 8 kadungan sang Bombo Medico 2018.
Tatlo ka tuig na nga na-stroke si Jocelyn gani indi na ini makahulag kag makahambal sang maayo kag indi naman ini makaguwa sa ila balay.
Apang wala nadala si Jocelyn sa venue sang medical kag dental mission bangud nagtaliwan ang iya bana sang Hulyo 7.
Nagabaligya sang una si Jocelyn kag iya bana nga si Ramy Sr. sang isda sa nasambit nga barangay agud buhion ang lima nila ka mga kabataan apang nangin mas mabudlay ang kabuhi sang ila pamilya matapos nga ini ang na-stroke kag sini lang napatay man ang iya bana.
Bangud sang sitwasyon sini, nagpalapit ang bayaw sini nga si Phoebe Bitco sa Bombo Radyo Bacolod humalin sang nagpanawagan para sa mga malauyag makakuha sang wheelchair.
Kagab-i personal nga gindul-ong sang estasyon ang wheelchair sa puluy-an sini kun sa diin nahamyang man ang iya bana.
Diri kag wala napunggan pa sang bata nga si Ramy Jr.nga mangin emosyonal sa pagpasalamat sa bulig bangud mangin masulhay na ang pag-atipan sa iya iloy.
Nahibaluan nga humalin sang na-stroke si Jocelyn sa berha nalang sang ila balay ini nagahigda, nagakaon, nagapaligo kag nagapamuhin bangud indi na ini makalakat.
Si Ramy Jr. ang nagatrabaho sa central sang tubo kag wala naman naga-eskwela pa ang duha niya ka mga manghod bangud nga wala man sang kwarta.
Sa Domingo natalana naman nga ilubong ang bana ni Jocelyn.
