BACOLOD CITY — Ginatutukan sang Bacolod City Police Office ang pagpanubo sang kaso sang theft kag robbery ukon pagpangawat sa palibot sang ciudad.
Sa command conference sang BCPO, ginmandu ni Police Senior Superintendent Jack Wanky nga tinguhaan sang mga ini nga mapanubo ang theft and robbery cases pinaagi sa pagpasanyog sang police visibility agud nga matahap ang mga riding-in-tandem nga nagapanghold-up sang ila matsambahan sa dalan kun gab-i.
Apang kadungan sini, nagpanawagan si BCPO spokesperson Police Supt. Noel Polines sa mga pumuluyo nga mangin security conscious kag indi lang basta-basta nga magsalig sa mga pulis.
Suno kay Polines, likawan ang paglagaw sa mga madulom nga lugar nga wala sang tawo kun madalom na ang gab-i kag likawan man ang pagdala sang mga valuables ukon malahalon nga pagkabutang.
Kun nagabantay man ang pulis suno sa opisyal, indi nila masakupan ang tanan nga lugar sa ciudad kundi sila man lang ang ginabantayan sang mga kriminal.
Kadungan sini, nagpangabay man si Polines sa mga biktima nga magpasaka sang kaso batok sa mga suspetsado ilabi na kun nadakpan naman ang mga ini.
Suno sa opisyal sang pulis, isa sa mga problema ang unwillingness sang mga biktima nga magpasaka sang kaso amo gani nga indi matapna ang krimen.
