BACOLOD CITY — Ginkondenar sang Philippine Army ang pagpatay sang mga miyembro sang New People’s Army sa anay suldado sa Barangay Sebucawan, banwa sang Isabela, Byernes sang hapon.
Suno kay Col. Elizer Losañes, commander sang 303rd Infantry Brigade sang Philippine Army, wala sang rason ang mga NPA nga patyon ang biktima nga si Melvin Tovis sang Barangay Libas bangud indi na ini aktibo nga miyembro sang militar, kundi plain murder ang ila ginhimo.
Cebuano ang lingwahe sang mga suspetsado nga ginapahayag mga bataon pa amo gani nga nagapati si Losañes nga halin pa ang mga ini sa Negros Oriental.
Sang tinalikdan nga bulan, ginkumpirmar sang 303rd Infantry Brigade nga nagpangrecruit ang mga NPA sang bag-o nila nga miyembro sa isla sang Negros apang suno kay Losañes, indi bastante ang numero sang ila nga recruits.
Ang recruitment ang patimaan kuntani sang mga ini nga nagabaskog pa ang ila hubon apang sa monitoring sang militar, nagahina na ang mga ini.
Nagpanawagan naman ang opisyal nga hingalitan sang mga rebelde ang programa sang probinsya nga makabaton sang 300 mil pesos ang magasurrender ilabi na kun may dala nga armas.
