Ginkalipay ni Negros Occidental 3rd District Rep. Javier Miguel Benitez ang pagpatuman sang Energy Regulatory Commission (ERC) sang regional price cap sa Visayas kun sa diin mabuhinan sang masobra katunga ang August 2026 electric bill sang mga konsumidor.
Ginmando sang ERC nga per region ang pagcompute sang Secondary Price Cap (SPC) kag indi nationwide.
Nahibaluan nga nag-file si Benitez sang House Resolution No. 1430, nga nagahingyo sa House Committee on Energy nga usisaon ang bilyon-bilyon nga ancillary services ukon reserve power charges sang mga konsumidor agud mahibaluan kun ini ang ginagamit sa tion sang emerhensya.
Nagsugilanon man ang kongresista sa spokesperson sang ERC kun sa diin naghingyo ini nga maghimo sang tikang agot sa power crisis nga nagakaeskperyensyahan sang mga konsumidor sa bilog nga Visayas.
Kasunod sini, nagpasalig ang ERC nga magpaggwa sila sang order sa pagpaiway sang electric bills sang mga konsumidor.
Sa interview sang Bombo Radyo kay Benitez, ang regional price cap ang mas mas maayu sangsa pagpaiway sang electric bills bangud mabuhinan sang 54 porsyento ang mga electric bill sang mga konsumidor nga apektado sang kulang nga suplay sang kuryente sa Visayas.
Suno kay Benitez, mahimo nga magnubo ang August spot price sa Visayas halin P18,590 pakadto sa P8,470 kada megawatt-hour ukon 54 percent reduction.
Suno diri, ipaggwa sang Independent Electricity Market Operator of the Philippines Inc. (IEMOP) ang recomputed bill sa mga electric cooperatives kag sa Setyembre 20, makita sang mga konsumidor ang adjustment sa ila nga electric bills.
Sa pihak nga bahin, may yara man sang 56 percent reduction sa electric bills sa Mindanao.
