Nagalaom ang residente nga halos 55 ka tuig na sa Prk Mahirup Carvic nga ang ginapatigayon nga pagreconstruct sang pika-pika ang mangin sabat na sa madugay na nga problema sa pagbaha sa tion sang madamol nga mga ulan.
Nahibaluan nga kaangay nga normal na lamang sa tion sang madamol nga ulan, nga may baha sa Prk Carvic, kag mas ginakatingala pa sang iban kun indi magbaha.
Sa interview sang Bombo Radyo Bacolod kay Romeo Lobaton Jr., sa Prk Carvic na ini natawo, kag diri naman nagdako bisan ang iya mga ginikanan.
Suno sa iya, sadto sa ubos lamang nagaluntad ang pagbaha, apang ini ang amat-amat nga nagsaka sumugod sang 1990s.
Sang tinalikdan nga tuig, nagdangat na tubtob sa dughan ang tubig baha sa ila nga balay, apisar nga elevated ang salog sang ila nga balay.
Ginsuguran ang construction sang bulan sang Mayo kag target nga matapos sa Hulyo.
Ginpataas man ang pika-pika sang sapa sa bahin sang mga pamalay.
Ini agud hinali nga magsaka ang tubig, ini ang maga-awas sa pihak nga bahin sang suba nga wala sang mga balay.
Suno kay Lobaton, may-ara naman sadto sang tamburong nga amo ang nagapagwa sang tubig pabalik sa sapa, apang ini ang gamay lamang.
Sa karun, ini ang gin-islan man sang dako nga tamburong agud mas madasig magpahubas sang tubig inkaso magbaha.
Dugang pa sini nga may stopper man ang tamburong ukon takop, agud hinali nga magsaka ang tubig sa sapa indi magsulod sa tamburong kag magpabaha sa Prk Carvic.
Suno kay Lobaton, lauman na ang mas masami nga pag-ulan ulan sini nga mga binulan, gani nagalaom siya nga matapos na ang proyekto kadungan sa pangabay nga ini ang epektibo.
