Gin-aprubahan na sang Department of Budget and Management (DBM) ang pagpagwa sang masobra P30 billion nga pondo para sa regular pension requirements sang mga military kag uniformed personnel (MUP) para sa una nga quarter sang tuig 2025.
Ang tikang ang ginhimo sang nasambit nga ahensya bilang pagsunod sa mando ni President Ferdinand “Bongbong” Marcos Jr.
Suno kay Pangandaman, ang nasambit nga P30.409 billion nga pondo ang ginpain para sa Pension and Gratuity Fund (PGF) sa idalom sang Republic Act (RA) 12116 ukon ang FY 2025 General Appropriations Act (GAA).
Nagdangat sa P16.752 billion ang gin-pain sa Armed Forces of the Philippines – General Headquarters-Proper kag sa Philippine Veterans Affairs Office sa idalom sang Department of National Defense (DND).
Samtang, yara sa P13.297 billion ang gin-pain para sa mga attached agencies sang Department of Interior and Local Government (DILG) kalakip ang Philippine National Police, Bureau of Fire Protection, Bureau of Jail Management and Penology kag National Police Commission.
Nagpagwa naman ang DBM sang P8.530 million nga pondo para sa 34 ka mga pensioners nga yara sa idalom sang National Mapping and Resource Information Authority (NAMRIA) sang Department of Environment and Natural Resources (DENR).
Samtang, ang mga funding requirements para sa pagbayad sang mga pension sang 2,836 retirado nga uniformed personnel sang Department of Transportation (DOTr)-Philippine Coast Guard (PCG) para sa pareho nga panahon ang nagabalor na man sang P350.680 million.
Ang pagpagwa sang nasambit nga pondo ang nakabase sa actual nga pension payroll nga gin-sumiter naman sa mga nasambit nga MUP agencies sadtong Disyembre 31, 2024.
