Magapaindis-indis bwas ang napulo ka mga Barangay sa Barangay Festival Dance Competition nga magaserbe highlights sang 86th Bacolod City Charter Day.
Sa interview sang Bombo Radyo Bacolod kay Rodel Parcon, secretariat sang Ang Paghanduraw, ang aktibidad nga ‘Ang Paghanduraw’ ang ginsuguran nila sang Hunyo 12 kag magatakop sa Hunyo 19, apang bwas amo ang highlight.
Ang 86th Bacolod City Charter Day ang may tema, ‘Pagsaulog sang Pagbag-o Para sa Mas Masanyug nga Asenso sang Bacolod’.
Alas-7:00 bwas sa aga, maga-umpisa sang Charter Day Parade gikan sa Barangay Bata, Alangilan, Mansilingan kag Sum-ag nga magatabuay sa Bacolod City Government Center (BCGC) Grounds.
Alas-5:00 sang hapon naman ang Charter Day Awarding Ceremonies kun sa diin may walo ka pasidunggan nga ‘most outstanding employees’, lima ka individual kag lima ka corporation top business taxpayers, kasubong man sa top realty taxpayers.
Magahatag man sang pasidungog para sa Be The Change Award kag Ang Banwahanon Award.
Alas-8:00 sang gab-i, maga-umpisa na ang paindis indis sang 10 ka mga Barangay kun sa diin sila ang ginhatagan sang P10,000 cash subsidy bilang preparasyon.
Ang Champion ang magabatun sang P80,000, samtang P50,000 ang 1st runner up, P30,000 sa 2nd runner up samtang tag-P10,000 naman ang mabatun sang magadaog sang Best in Costume, Best in Choreography kag Best in Concept.
