Ginpahayag sang abogado kag anay konsehal sa Bacolod City nga bisan indi na ipaagi sa layi, sarang mabutang sa internal rules sa Lower kag Upper Chamber sang Kongreso nga wala sang sweldo ang mga absent sa session.
Sa interview sang Bombo Radyo Bacolod kay Atty Renecito Novero, maayo man ang hagna nga ginfile ni House Majority Floor Leader Sandro Marcos.
Ini kasunod sang absences ni Cavite 4th District Representative Kiko Barzaga, kasubong man ang madugay na nga pag-absent ni Senator Bato Dela Rosa sa mga session sang Senado.
Suno kay Novero, ang mga kongresista ang may ginarepresentar nga distrito ukon sektor.
Kag sila ang ginboto agud magserbe nga tingog kag mabatian ang concerns sang ila distrito sa Kamara ukon Senado.
Gani unfair para sa mga botante kun ang ila Representative ang wala nagatambong sa session, apang padayun nga nagabatun sang sweldo.
Luwas sa Kongresista kag Senador nga absent, segi man ang sweldo sang ila nga mga staff, apisar nga sila ang wala man sang trabaho kun wala ang mga kongresista.
Pahanumdom ni Novero nga bisan wala sang layi, ang House of Representative ukon Senado ang sarang makahuman sang internal rules nga magasuspend sang sweldo kun indi makatambong.
Ini ang anay ginapatuman na sa tion sang Ramos Administration, tubtob nga ginpatuman ang Standardized Compensation package.
Suno kay Novero, ini ang sarang mabalik agud matapna ang katamaran ukon irisponsibilidad sang mga mamalidha sa lokal man ukon national level.
Aminado ang abogado nga may mga mamalidha nga wala nangin papel na lamang ang paghatag sang proyekto sa ila distrito, bangod diri sila makaganar sang dako.
Sa baylo, sila ang wala sang partisipasyon sa mga session, deliberasyon kag hearing, kag wala nagakahatagan sang hustisya ang ila papel bilang Representatives.
Suno diri, wala sang problema kun mag-absent bangod sa official travel.
Pahayag sini nga sarang mapunggan sang hagna ukon polisa ang pagpinagusto sang mga mamalidha sa mga private travels, nga kaangay nga nagakalipatan na nga sila ang tingog sang ila distrito.
Samtang kun maglain naman ang pamatyag, kinahanglan naman nga magpakita sang medical certificate nga nakanotaryo.
Nahibaluan nga ang mga mamalidha ang nagabatun sang P293,521 tubtob P354,059 nga sweldo kada bulan, kag mas mataas pa kun sila ang may committee chairmanship.
