Nagapati ang pakaisa sang 15 anyos nga dalagita nga nasapwan sang Miyerkules nga wala na sang kabuhi sa sulod sang kampo sa Hacienda San Roque, Brgy. Cubay, La Carlota City, Negros Occidental nga may kahilabtanan ang stepfather sini sa natabo sa iya.
Sa interview sang Bombo Radyo Bacolod kay Janna Portoza, nakapanugid ang magulang niya sa iya nga nakamuno si Pearl Joy diri nga nakaagi siya ginhikap sa dughan sang iya stepfather nga si Rene John Nasis.
Suno kay Janna, makita man sini nga palangga si Pearl Joy sang iya stepfather kag nagbulig man ini sa pagpangita sang nadula ang iya pakaisa.
Suno diri, sang wala pa nadula ang iya pakaisa, kun magab-ihan ang stepfather man sini ang nagapangita sa iya kag indi man ini luyag nga magab-ihan pauli si Pearl Joy.
Samtang, indi lang ang stepfather ang nakahikap sa dughan sang biktima bangud mismo si Janna ang nakakita sang ginahimas man sang nagmasahe sadto kay Pearl Joy ang dughan sini.
Suno kay Portoza, ginpahayag man ni Pearl Joy sadto ng nagasinggit siya bangud ginahikap na ang dughan sini apang wala man sila nakabati.
Nagapati gid ini nga ang stepfather ang mahimo may kahilabtanan sa natabo sa iya pakaisa bangud sadto nadakpan niya man nga nagalili ini sa ila ginatulugan.
Suno diri, ang tanan niya nga nahibaluan ang ginatuad niya agud makabulig sa imbestigasyon kag mahatagan sang hustisya ang kamatayon sang iya pakaisa.-
