Pahanumdom sang Secretary General sa Kilosang Mayo Uno nga indi na dapat pa nga maghulat nga may maghibi nga mamumuhon antes ihatag sang gobyerno ang nagakaigo sang mga ini nga sweldo kag benepisyo.
Sa interview sang Bombo Radyo Bacolod kay Kilusang Mayo Uno Secretary-General Noli Rosales, ginkumpirmar ni Agriculture Secrerary Francisco Tiu Larel Jr. nga nabatun na sini ang complaint batok kay Confederation of Sugar Producers Association Inc. (CONFED) National President Aurelio Gerardo Valderrama Jr..
Gina-alegar sang malapit 30 ka trabahador nga sila ang ginaswelduhan sang manubo sa mandated wage, kag wala ginahatagan sang statutory benefit lakip na sang 13th‑month pay.
Wala man sila nakabaton sang carabao share kag 3 percent nga bahin sang Sugar Amelioration Bonus.
Suno kay Rosales, si Laurel ang ginsugo ni First Lady Liza Araneta-Marcos nga atubangon ang reklamo sang mamumugon.
Apang indi lamang sa nasambit nga hacienda ang dapat lantawon kundi ang kabug-usan nga pakyaw system.
Ini agud makita kun ano ka nubo ang swelduhanay, kun sa diin ginapahayag nga bisan ano nga pagtinguha, ini ang indi gid makabatak sa pangabuhi sang mamumugon.
Suno diri, dapat matun-an kun kinahanglan na nga i-abolish ang pakyaw system sa bilong nga Negros Island.
Pahayag ni Rosales nga ginapasalamatan sang mga mamumugon nga sila ang ginpamatian, apang ginakasubo naman sini nga kinahanglan pa nga magviral ukon may maghibi antes makita sang ahensya sang gobyerno ang problema.
Panawagan man nila sa Department of Labor and Employment (DOLE) nga magpatigayon sang routine inspection sa mga planters, dako man ukon gamay, agud maseguro nga nagakasunod ang labor standard.
Samtang dapat man nga maseminar ang mga planters kag empleyado agud mahangpan sang mga ini ang ila nga kinamatarong.
