BACOLOD CITY— Wala na sang iban nga ginhimo ang record breaker sa Javelin Throw Elementary Girls sa nagapadayon nga Palarong Pambansa 2018 sa probinsiya sang Ilocos Sur kundi ang magpasalamat sa iya pamilya kag sa Ginoo matapos ang kadalag-an.
Ang 13-anyos nga si Avegail Biliran sang Granada Elementary School sa banwa sang Carles, Iloilo ang nangin record breaker sa iya nga 41.46 meters finish kahapon.
Ginguba sini ang daan nga record ni Gia Bucag nga 40.63 meters sang Central Luzon sang 2010.
Todo pagpasalamat na lang si Biliran sa iya nga coach, sa iya teacher, iya mga ginikanan kag sa Mahal nga Diyos nga nakakuha ini sang gold kag nangin record breaker sa national sporting event.
Suno naman sa coah sini nga si Jomari Sandoy, wala na sang iban nga sekreto sa kadalag-an ni Biliran kundi gintudlo lang niya diri ang iya tanan nga nahibaluan sa patag sang Javelin Throw.
Ginbuyagyag man sini nga may eskwelahan na sa ciudad sang Iloilo nga nagatanyag sang scholarship kay Biliran apang mas luyag sini nga magpabilin lang anay sa Carles sa iya nga high school year.
Aminado naman si Sandoy nga tuman ka mahuluyaon si Biliran.
