Dako ang pagpati sang pamilya sang lima ka tuig nga bata nga nasapwan nga wala na sang kabuhi, nga may foul play sa pagkamatay sini.
Sa interview sang Bombo Radyo kay Mary Grace Aguirre, sang Disyembre 21 sang hapon, ginhambalan sini ang iya manghod nga si Quinie nga magtulog.
Suno diri, natulogan siya kag wala nabatyagan nga naggwa ang iya manghod bangod pagbugtaw sini wala na ini sa iya tupad.
Amo yadto ang ulihi nila nga nakita si Quinie apang kahapon, may nareport nga may bangkay sang bata nga nasapwan sa sapa sa Prk Sto Domingo, isa ka kilometro ang kalayuon sa balay nila sa Purok Manville Phase 6A Brgy. Handumanan.
Ginkilala nila ang bata nga amo ang iya manghod bangod ila nakita ang panapton sini.
Suno kay Mary Grace, desidido sila nga ipa-autopsy ang bangkay sang ila manghod bangod may yara ini sang pilas sa lawas kag ulo nga kaangay nga ginlamposan.
Samtang, nagpasalig naman si Bacolod City Mayor Alfredo ‘Albee’ Benitez nga magahatag ini sang bulig sa pamilya Aguirre.
Santo sa statement nga ginpagwa sang alkalde, iya buligan ang iloy kag duha ka utod sang biktima nga yara sa Manila nagatrabaho nga makapauli diri sa Bacolod.
Sabat sang alkalde ang plete sang mag-iloy kag burial para sa biktima.
Nagmando man ini sa Bacolod City Police Office sang intense nga imbestigasyon kag nagpasalig nga sabton sang may sala ang ginhimo sini sa lima ka tuig nga bata.
