Padayon pa ang imbestigasyon sang Bacolod Police Station 6 sa motibo sa pagluthang patay sa driver sang van sang Cosmopolitan Christian Church kahapon sa Brgy.Taculing, Bacolod City.
Ginkilala ang biktima kay Efren Banaglorioso, 59 anyos kag residente sang Brgy.Granada, Bacolod City.
Sa interview sang Bombo Radyo Bacolod kay Police Captain Rosalino Pugoy Jr, station commander sang Bacolod Police Station 6, duha ang giantulok nga suspek sa krimen nga amo ang driver montero kag gunman.
Suno diri, isa man sa ginalantaw nila sa karun amo nga mahimo nasal-an lang si Banaglorioso. Samtang, nagpanawagan sang hustisya ang pamilya sang driver sang van sang Cosmopolitan Christian Church nga ginluthang kahapon sa Brgy.Taculing, Bacolod City.
Kahapon sang aga, ginluthang sa gwa sang simbahan si Efren Banaglorioso, 59 anyos kag residente sang Brgy.Granada, Bacolod City samtang manugtapos na ang misa.
Sa inisyal nga imbestigasyon may Montero nga nagbyahe halin sa norte nga bahin kag nag-u turn kun sa diin nanaog ang isa ka lalaki kag ginluthang sang pila ka beses si Banaglorioso nga nagtuga sang iya gilayon nga kamatayon.
Suno kay Isidra Villarin, magulang ni Banaglorioso, kapin sa 40 ka tuig na nga nagatrabaho ang iya manghod sa simbahan.
Suno diri, maboot kag wala sang kontra ang iya utod.
Nagapanawagan ini sa karun sang hustisya para sa iya manghod nga may mga kabataan kag mga apo na kag siya pa ang nagasagod sa iya pamilya. Sa pihak nga bahin, hugot nga ginkondenar sang Punong Barangay sang Brgy Granada, Bacolod City ang pagpatay kay Efren Banaglorioso nga residente sang Barangay.
Suno kay Punong Brgy Armando Vito, maayo nga klase sang tawo si Banaglorioso kag wala ini sang rekord nga may nakontra ukon may gintuga nga gamo sa Brgy.
Suno diri, blangko sila tanan kun ano ang motibo sa pagpatay kay Banaglorioso nga isa lang ka simple nga tawo.
Nagpasalig naman si Vito nga mabulig sa pamilya para sa haya ni Banaglorioso sa pagpahulam sang bangko kag mga trapal.
