Desidido ang pamilya sang Grade 10 student nga ginbuno-patay sa gwa sang VMA Global College sa Purok San Sebastian, Barangay Sum-ag, ciudad sang Bacolod nga magpasaka sang kaso nga murder batok sa suspetsado.
Madumduman nga kahapon sang udto, hinali nalang nga ginbuno sang makapila ka beses ni Ray Jan Carmelotes, 27-anyos sang Purok A. C. Yulo, Barangay Sum-agang biktima nga si Alexis Genise Jr. sang Purok Nami-Nami 1 sa sagwa sang eskwelahan gamit ang kitchen knife.
Sa interview sang Bombo Radyo Bacolod kay Police Lieutenant Jovito Pastrana, ginpahayag sini nga ginahanda na nila ang mga dokumento agud nga mapasaka ang kaso nga murder batok kay Carmelotes.
Suno kay Pastrana, nakaangkon sang madamo nga pilas tuga sang pagpamuno si Genise kun sa diin patal nga igo sini ang yara sa iya nga tiyan kag liog.
Ginapahayag man nga nalab-ot gid ang baga kag atay sang biktima rason nga ginbawian siya sang kabuhi.
Dugang pa sang hepe nga sang Martes sang gab-i gid lamang nag-abot sa Bacolod nagikan sa Manila si Carmelotes.
Indi pa man subong matumod kun ano ang motibo ukon rason sa pagpatay sang suspetsado kay Genise bangud lalong pa ini sa iligal nga druga.
Samtang, indi naman ma-istorya sang husto si Carmelotes.
Suno sa suspetsado, nakonsensya man siya sa iya nga ginhimo apang indi niya madumduman kun ngaa nabuno niya si Genise.
Suno sa iya, wala niya man ginplanuhan nga patyon ang biktima.
Gin-ako man sini nga duha na siya ka tuig nga nagagamit sang iligal nga druga.
Nahibaluan man nga mag-abyanay sanday Carmelotes kag Genise.
