Magaconvene ang konseho sang Barangay Vista Alegre, Bacolod City sa Biyernes agud istoryahan kun ano ang ila mabulig sa pamilya sang 31-anyos nga iloy nga nadulaan sang kabuhi matapos nahulugan sang bato samtang nagapanglaba sa suba sang Purok Kabulakan sang Domingo sang aga.
Ang biktima nga si Ginalyn Iniez, kasado kag may tatlo ka mga kabataan ang nagapanglaba kaupod ang iya iloy kag mga himata sa higad sang suba kag sang matindog na ini kuntani, hinali lamang nga natiphag ang bato nagikan sa bakyas nga bahin sang suba kag ini ang nahulugan sa iya likod.
Nakaangkon si Iniez sang internal injuries kag santo sa medical bulletin sini, nabali ang iya rib cage kag naglupok ang atay sini kag tinae.
Suno kay Barangay Kagaward Elizarde Benedicto, daw kaangay sa goma sang salakyan ukon daw labador nga dako ang kadakuon sang bato nga nagtupa sa biktima.
Pagkatapos sang insidente suno kay Benedicto, nagtawag ang ila punong barangay sa tag-iya sang duta kag lantawon pa sini kun ano ang iya himuon sa area.
Suno diri, magaconvene pa ang council sa Biyernes agud istoryahan ang ila mabulig sa pamilya sang biktima.
Ginkordon naman sang mga opisyales sang barangay ang area.
Nagalaom si Benedicto nga indi na maliwat ang natabo kag nagpanawagan sa mga pumuluyo nga mangin vigilante kag kun may nakit-an nga danger, sila na lamang ang magmato-mato palayo.
