Magadangop sa National Bureau of Investigation ang pamilya sang lalaki nga naglumpat nagikan sa 4th floor sang Ayala Malls Capitol Central kahapon sang kahapon.
Ini matapos nadiskubrehan sang pamilya sang biktima sa Barangay Sum-ag, Bacolod City nga ginpakahuy-an ini sa Facebook bangud sa iya utang.
Ang nagpost ang naghatag sang deadline nga dapat makabayad ang biktima alas-5:00 kahapon sang hapon apang pasado alas-4:00, nagsuicide ang lalaki.
Sa karon, deleted na ang post sang isa ka manugsukot samtang nagdeactivate naman sang account ang isa.
Ang biktima ang ilo na sa ginikanan kag tiya sini sa Sum-ag ang nagpadako sa iya.
Siya ang nagatrabaho sa balaligyaan sang computer sa SM City Bacolod.
Sa pagpadulong sang Bombo News Team sa balay sang tiya, nagbalibad ini nga maghatag sang recorded statement apang iya ginpahayag nga magadangop sila sa NBI sa tion nga mahimos na ang bangkay sang iya hinablos.
Samtang, indi naman makapati ang mga abyan sang biktima nga mahimo niya ang natabo.
Sa interview sang Bombo Radyo Bacolod kay Czarina Romero, suod nga abyan sang biktima, ginpahayag sini nga college classmates kag mag-bestfriend gid sila.
Wala gid nila gin-antisipar nga mahikog ang biktima bangud nga palakadlaw ini nga klase sang tawo.
Apang, iya nanotisyaran sang tinalikdan nga daw may yara sang problema ang biktima.
Suno kay Romero, naghulam pa kuntani sang kwarta ang biktima sa iya sadtong Pebrero 13 apang wala siya nakapahulam.
Bangud indi mahim-os, ginpadulungan niya ini sa mall kun sa diin nagaobra ang biktima bangud nga wala na ini nakapabatyag.
Apang naghambal man ang biktima nga okay lang siya kag wala sang problema.
Gani ila gid ginkakibot ang natabo kahapon.
Suno naman sa isa sa mga staff sa one-stop-shop nga nahamtang sa 4th fl sang mall, mga alas-2:00 kahapon sang hapon sang nakita nila nga nagabalik-balik ang biktima sa 4th fl.
Suno sa iya, makit-an gid sa nawong sang biktima nga indi ini mahim-os kag problemado.
Mga alas-4:00 sang hapon sang ulihi nila ini nga nakit-an antes sila magpauli.
Ginkakibot naman nila sang ila nabalitaan pasado alas-4:00 kahapon sang hapon ang natabo.
Suno sa iya, posible nga ginhulat lang sang biktima nga wala na sang tawo sa 4th fl kag naglumpat.
Samtang, ginkumpirmar naman ni Joemarie Vargas, cluster head sang CDRRMO, nga may yara sang psycho social first aid ang ciudad apang wala pa ini nasuguran.
Suno sa iya, tinutuyo sini kuntani nga mabuligan ang mental health sang pumuluyo ilabi na subong sa panahon sang pandemya.
Suno sa iya, maga-establish pa sila sang hotline para diri.
Gina-una anay sa karon suno kay Vargas amo ang vaccination program sang ciudad.
Nagpanugyan man ini sa publiko nga ipahibalo gid sa pamilya ukon sa mga abyan kun may yara sang problema.
