Desidido ang pamilya sang 43 anyos nga lalaki nga napatay sang anay aktor nga si John Wayne Sace nga magpasaka sang kaso nga murder.
Madumduman nga sang Lunes ginluthang ni Sace ang biktima nga si Lynell Eugenio kun sa diin nag-agom ini sang igo sa nagkalain-lain nga bahin sang iya lawas nga gintunaan sang iya kamatayon.
Matapos ang shooting incident nagsakay si Sace sa taxi papalayo sa area apang sang Martes naaresto ang anay aktor sa isa ka motel.
Suno sa bata sang biktima nga si Cristel Eugenio, ila ginkakibot ang ginhimo ni Sace bangod nga mag-abyan sila nga duha sang iya amay.
Wala man ini nagapati sa panindugan ni Sace nga nakabaton ini sang pagpamahog gikan sa biktima.
Dugang pa sini, kun kaisa halos wala na sang oras sa ila ang iya amay bangod nga masami ini nga nagabulig kay Sace sa iya mga problema.
Pahayag ni Eugenio, luyag nila nga manabat si Sace sa ginhimo sini nga pagguba sa ila pamilya.
