Nagpangayo sang pasaylo ang anay City Administrator sang Bacolod kag isa sa mga tag-iya sang VMA Global College matapos nga nabun-an patay ang isa sa ila mga estudyante nagligad nga Mierkoles.
Ini apisar nga ginpanindugan ni Atty. John Orola, nga sa guwa na sang eskwealahan natabo ang pagbuno sang suspetsado nga si Ray Jan Carmelotes, 27-anyos sang Purok A. C. Yulo, Barangay Sum-ag sa biktima nga si Alexis Genise Jr. sang Purok Nami-Nami 1.
Kasunod sang insedente, ginsapol man ni Orola ang Parent-Teachers Association (PTA), High School Principal kag mga opisyales sang eskwelahan kag mismo si Bacolod City Police Office (BCPO) Director Police Colonel Henry Biñas.
Ginpahayag ni Orola nga sa iya pagsapol kay Biñas, ginhaylo niya ini nga dapat ipatuman gid ang mga ordinansa nga nagadumili sang mga computer shop, bilyaran kag pagbaligya sang makahulubog nga ilimnon malapit sa mga eskwelahan.
Ginhingyo man sang anay City Administrator sa BCPO nga mag-deploy sang security forces malapit sa lugar agud mabantayan ang palibot.
