Handa naman ang Department of Education Division of Bacolod City sa pagpatigayon sang pilot run sang limited face to face classes.
Suno kay Bacolod City Schools Division Superintendent Gladys Amylaine Sales, dako ang pagpasalamat sini sa mga stakeholders kag principal sang Alangilan National High School sa pagbaka-baka agud matigayon ang pag-umpisa sang pilot limited face to face classes.
Ginsiguro man nga fully vaccinated ang manunudlo kag estudyante nga mangin participant sa limited face to face classes.
Gin-aprubahan man sang alkalde sa meeting sang Dep Ed kag Emergency Operation Center (EOC) ang pagpatigayon sang limited face to face classes kasubong man naghatag man sang pahanugot ang mga ginikanan.
Suno kay Sales ang Alangilan National High School ang ila ginpili agud patigayunon ang limited face to face bangud wala na sang rekorded nga kaso sang COVID-19 sa sulod sang duha ka bulan.
Research kag Technical Vocational nga mga subject naman ang una nga talakayon sang mga manunudlo.
Magapadayon man ang ila nga blended learning apisar sang face to face.
Ginpahayag man ni Sales nga maayo gid nga makaumpisa na ang face to face classes bangud kinahanglan sang estudyante ang social inter-action.
Ang Division Office sang DepEd ang naga assess sang mga eskwelahan nga mahimo patigayunan sang face to face classes kag ginahatag sa Regional Office para sa shortlist nga ipasa sa Central Office para sa approval.
Samtang nagpanawagan man ini sa iban pa nga mga manunudlo nga wala pa nagpabakuna nga magpabakuna na, kag wala man naga-untat ang pag-edukar sini sa iban nga nagapalibad pa nga magpabakuna batok sa COVID-19.
