BACOLOD CITY-Patay ang isa ka pastor matapos ginluthang sang apat ka mga wala pa makilal-an nga mga suspetsado sa Sitio Pinus-an, Barangay Camindangan ciudad sang Sipalay kahapon.
Ginkilala ang biktima kay Lonie Lahao-Lahao, 54-anyos kag residente sang nasambit nga lugar.
![](https://img.bomboradyo.com/bacolod/2020/02/pastor-lahao-lahao-1.jpg)
Sa interview sang Bombo Radyo Bacolod kay Lt. Col. Necerato Sabando, hepe sang Sipalay City Police Station, ginpahayag sini nga papauli na kuntani ang biktima upod ang iya asawa sakay sa ila nga tricycle sang hinali lang may nagbangga sa ila nga apat ka mga kalalakin-an.
Gilayon naman nga ginluthang si Lahao-Lahao kun sa diin nakaangkon ini sang mga pilas sa nagkalain-lain nga bahin sang iya lawas nga gintunaan sang iya kamatayon.
![](https://img.bomboradyo.com/bacolod/2020/02/87987226_635310343913986_192535485434822656_n.jpg)
Dugang pa ni Sabando nga gilayon nga nagpalagyo ang mga suspetsado matapos ang insidente.
Nahibaluan nga gina-alegar informant sang militar si Lahao-Lahao sa ila nga lugar.
Isa man ini ka anay barangay kagawad kag naka-agi man padalagan bilang konsehal sang ila ciuadad apang wala nagdaog.
Santo man sa pagpangusisa sang kapulisan sa asawa sini nga sang Disyembre 2018, ginsulod man ang ila puluy-an sang kapin napulo ka mga armado nga mga kalalakin-an kag ginpangitaan sang armas apang wala sila sang may nakita.
Sa karon, padayon pa ang imbestigasyon sang Sipalay City Police Station sa nasambit nga insidente.