Nakaagom sang minor injury ang driver sang pribado nga salakyan matapos nga mabungguan ang nakaparking nga patrol car sang Bacolod Police Station 5 sa Barangay Granada, ciudad sang Bacolod kaina alas 11:50 ang takna kaina sang aga, Hunyo 16, 2024.
Sa interview sang Bombo Radyo Bacolod kay Police Captain Portia Nillosan, station commander sang Bacolod Police Station 5, bag-o lamang nagparking ang patrol car sa nasambit nga police station agud magpaniaga kuntani ang driver sang hinali lang nabungguan ini sang nagapadulong nga Toyota Vios nga nagikan sa Barangay Alangilan sa nasambit nga ciudad.
Suno kay Nillosan, nagkupos ang panguluhi nga guma sa nawala nga bahin sang patrol car samtang nawasak naman ang bumper sang pribado nga salakyan.
Suno sa station commander, ang rason nga nabungguan sang driver sang pribado nga salakyan ang patrol car sang Police Station 5 amo nga napiyungan ini samtang nagamaneho.
Ginpahayag man sini nga mahimo man pasakaan sang nagakaigo nga kaso ang driver sang pribado nga salakyan bangud sa aksidente.
