Nagsugod na ang mga persons deprived of liberty sa Negros Occidental District Jail sa paghimo sang Christmas lanterns samtang nagahilapit ang yuletide season.
Sa interview sang Bombo Radyo Bacolod kay Jail Chief Insp. Kevin Bonilla, jail warden sang NODJ, sang Agusto nagsugod ang mga PDL sa paghimo sang skeleton sang mga parol agud nga butangan nalang ini sang charol kun may customer nga maorder.
Sa karon, may yara sang 20 tubtub 30 ka skilled workers nga PDLs sa NODJ nga nagahimo sang Christmas lanterns agud nga maka-income kag makabulig sa ila nga pamilya.
Suno kay Bonilla, may skills na ang iban nga PDL antes napriso gani ginasupervise sila sang inmates welfare and development officer nga tudluan ang iban nga priso nga gusto man magtuon maghimo sang parol.
Kawayan ang skeleton sang Christmas lanterns gani may mga service providers nga nagahatag sang mga materials kag pang-capital sang mga PDLs.
Ang Christmas lanterns ang nagabili sang P800 tubtub P2,000, depende sa kadakuon kag pwede man makapacustomize sang gusto nga design.
Ang income sa pagbaligya sang parol ang nagakadto mismo sa mga PDL nga nagahimo sini.
Suno kay Bonilla, ginalauman nga mangin mas mabakal ang mga parol sa bulan sang Oktubre.
