Ginapangabay sang abogado nga kuntani ma-amyendahan ang layi nga nagahatag sang penalidad sa mga contractors nga makakumiter sang kurapsyon kaangay sa anomalya sa flood control projects.
Sa interview sang Bombo Radyo Bacolod kay former Bacolod City Councilor Atty Renecito Novero, private citizen ang mga contractors sang Department of Public Works and Highways (DPWH) gani sila ang indi mapasakaan sang kaso sa Ombudsman, magluwas kun may kaupod nga makasuhan nga public officials.
Lakip sa ginalantaw ni Novero nga mahimo ma-involve sa mapasakaan sang kaso amo ang DWPH personnel ukon executives, mga kongresista, gobernador kag alkalde nga mahimo may kaangtanan sa anomalya.
Suno diri, sarang mapasakaan sang kaso nga Republic Act 319 ukon Anti-Graft and Corrupt Practices Act kag mahimo man nga Republic Act 315 ukon Bribery, apang nakadepende na sa prosecutorial arms sang gobyerno kun ano ang ifile nga kaso.
Apang santo sa Republic Act 11711 ukon Contractors License Law, isa lamang ka tuig ang penalidad nga pagkapriso kag pagkadisqualify sang lisensya sa pagpangontrata.
Apang makaligad sang isa ka tuig, sarang na liwat nga makabalik sa pagpangontrata ang mga unscrupulous contrators.
Sa bahin naman sang fine ukon monetary penalty, ang bayaran lamang sang akusado amo ang one-tenth sang 1 pecent sang balor nga nadula.
Gani ginapanawagan sini nga ma-amyendahan ang layi kag mapasaka ang mga penalidad.
Sa pihak nga bahin, ang public official naman nga ma-imbulbar ang mangatubang sang administrative sanctions luwas pa sa criminal case.
Kun sa diin sila ang madisqualify sa pagkapot sang bisan ano nga opisina sa gobyerno. Samtang…nanawagan ang anay konsehal sa ciudad sang Bacolod nga hikutaron ang resolusyon nga nagapanawagan sa Department of Public Works and Highways nga magsumiter sang kopya sang listahan sang tanan nga proyekto.
Sa interview sang Bombo Radyo Bacolod kay Atty Renecito Novero, ang kurapsyon ang makapatay, kag ang mga kurakot nga opisyal ang mga manugpatay.
Ini bangod ang billion ukon trillion pesos nga ginkawat sa kaban sang gobyerno ang magamit pa kuntani sa pagbakal sang bulong, pagtukod ukon pakay-o sang ospital, pagtukod sang mga eskwelahan kag pagpasanyog sang educational programs sa Pilipinas.
Bangod sa kurapsyon, halos indi na sini mapinsaran kun ano kadako ang oportunidad nga ginpatay.
Suno kay Novero, sang siya ang kabahin pa sa Sangguniang Panlungsod sa Bacolod City, siya ang nag-author sang resolusyon nga nagademand sa DPWH nga magsumiter sang tanan nga listahan sang ila mga proyekto, lakip na ang nahuman na kag ang hilimuon pa lamang.
Kabahin man sa ginapangayo nga detalye ang costs sang proyekto, duration kasubong man kun sin-o ang contractor.
Pahayag sini nga kun kis-a may makabig nga pet contractors, nga amo na lamang ang pasulit-sulit nga ginakuha sang ahensya.
Apang natapos na lamang ang iya termino sa pagserbisyo, wala gid makasumiter ang DPWH.
Hingyo sini nga kun indi mahatag sa konseho, maayo man kun ang dokumento ang deretso nga isumiter sa mga mainstream media kaangay sa Bombo Radyo Bacolod para sa transparency. Sa pihak nga bahin, nagapati ang abogado kag anay konsehal sa ciudad sang Bacolod nga kun hungdon lamang sang Natioal Bureau of Investigation (NBI), mahapos lamang nga matumod ang mga public officials nga nagahimo sang kurapsyon.
Sa interview sang Bombo Radyo Bacolod kay Atty Renecito Novero, magluwas sa mga contractors kag empleyado ukon opisyal sang Department of Public Works and Highways (DPWH), klaro man nga may involved nga mga public officials sa anomalya sa flood control projects kaangay sa mga kongresista.
Aminado man ang anay konsehal nga may mga tampad pa nga mga kongresista, apang ang mga nagapangurakot ang dapat nga maglu-ad na.
Suno diri, sa pagpatigayon sang lifestyle check, madamo gid sang makit-an nga kwestyonable ang hinali na lamang nga pagtimbook sang manggad.
Kun maconvict ukon mapamatud-an sa kurapsyon, sila ang indi na mahimo makapungko sa ano man nga public office.
Nagapati man si Novero nga ang nagapanawagan nga unahon sa lifestyle check si President Ferdinand “Bongbong” Marcos Jr., ang defense mechanism lamang sang mga indi luyag ipagwa ang ila mga Statement of Assets, Liabilities, and Net Worth (SALN), income tax return kag bisan sang record sang properties nga ginapanag-iyahan.// Dugang pa sini nga madamo sang opisyal sa gobyerno nga ang ila propedad ang ginapangalan sa mga private individual.
Sa pihak sini, nagapati si Novero nga kun id-idan sang NBI ang imbestigasyon, mahapos lamang nila nga matumod ang mga ginatago nga assets sang mga opisyales sang gobyerno.
Ginakasubo sang abogado nga sa karun kulang nagid sa political morality ang Pilipinas kag bisan sa eleksyon indi na isyu bisan hayagan ang kurapsyon, bangod ang mga ini ang ginahakos gihapon sang tawo.
