BACOLOD CITY — Kuntento ang athletics team sang Pilipinas sa ila nga performance sa Southeast Asian Games sa Kuala Lumpur, Malaysia.
Domingo sang udto, naglupad na pabalik diri sa Pilipinas ang athletics team nga ginalakipan sang 42 ka miyembro kalakip na si Coach Rene Herrera sang probinsya sang Guimaras.
Sa interview sang Bombo Radyo Bacolod, ginpahayag ni Herrera nga lapaw sa ila nga target ang numero sang medalya nga natipon sang team sa SEA Games.
Suno kay Herrera, tatlo ka bulawan ang ila puntariya nga makuha apang sa kabilugan, lima ka gold medals, tatlo ka silver kag onse ka bronze medals ang nakolekta sang Philippine team kun sa diin ang katapusan nga gold medal ang nakuha sang 4×4 relay team sang Sabado sang hapon.
Aminado si Herrera nga disaster ang ulihi nga adlaw sang track and field bangud pila na ka adlaw ang pahuway sang mga runners kag kulang na sa kondisyon.
Apang nalipay gihapon ang Olympian coach nga nag-improve ang performance sang grupo subong nga edisyon sang SEA Games.
Isa naman ka victory party ang natalana nga hiwaton sang athletics team sa masunod nga mga inadlaw.
