BACOLOD CITY — Target sang Philippine Air Force nga makatipon sang masobra 500 ka mga applicants sa palibot sang Negros Occidental subong nga recruitment period.
Ini ang kadungan sang pagbukas sang Air Force sang pagbaton sang application para sa mga luyag nga mangin kabahin sang air operations unit sang Armed Forces of the Philippines.
Sa live studio interview sang Bombo Radyo Bacolod, ginpahayag ni Staff Sergeant Gerry Gil Gilongos, non-commissioned officer-in-charge sang Tactical Operations Group 6 sang PAF, 400 tubtub 500 ka mga applicants ang nagsubmit sang tinalikdan nga recruitment kag nagalaom sila nga ini ang malapawan agud nga mas magdamo pa gid ang mga miyembro.
Sarang nga maka-apply ang babayi ukon lalaki, basta citizen lang sang Pilipinas, nakatapos sang 72 units sa kolehiyo, nagataas sang 5 feet, naga-edad sang 18 tubtub 26 anyos, physically and mentally fit para sa military training kag may yara sang good moral character.
Subong nga tuig suno kay Gilongos, ginabaton na ang mga single mothers.
Sa mga luyag mag-apply suno sa iya, magpasa lamang sang form kag requirements sa opisina sang Tactical Operations Group 6 sa Camp Alfredo Montelibano sa Barangay Estefania, Bacolod City.
Magluwas diri, nagabaton man ang Philippine Air Force sang direct enlistment para sa flight attendants.
Ang applicant ang dapat nga single, nakatapos sang 72 units sa kolehiyo, 18 tubtub 23 anyos, physically and mentally fit para sa military training, 5’3” ang height kag may good moral character.
