BACOLOD CITY — Natapos sa patas ang sambuwa sang Philippine Football Team Azkals kag Yemen National Football Team sa ginpatigayon nga AFC Asian Cup UAE 2019 Qualifiers sa Panaad Park and Stadium kagab-i.
Pareho nga nag-angkon sang tag-duha ka puntos ang Yemen kag Pilipinas sa masobra isa kag tunga sa oras nga sambuwa.
Una nga naka-goal ang Yemeni player number 4 nga si Mudir Al-Radaei sa ika-25th minute sang hampang apang gilayon nagbalos sa ika-29th minute ang Azkals team captain nga si Phil Younghusband kag natapos sa 1-1 ang first half.
Liwat naghangkatanay sang tagsa nila ka kinaadaman sa sulod sang football field ang magtimbang nga team sa second half tubtob nga naka-goal ang player number 11 sang Yemen nga si Abdulwasea Al-Matari sa ika-54th minute.
Wala naman nagpasugot ang Azkals nga mabihangan kag nakabalhag sang ikaduha nga goal para sa Pilipinas ang utod ni Phil nga si James Younghusband sa ika-70th minute agud masiradhan sa 2-2 ang hampang.
Sa pihak sang matugnaw kag mabasa nga palibot bangud sang nagtupa nga ulan antes ang hampang, nangin mainit ang paghugyaw sang mga fans, nga lunsay nagasuksok sang bayo nga duag puti, sa pagpasahay sang bola sang mga players sa field.
Sa pihak nga nangin patas ang AFC Asian Cup UAE 2019 Qualifiers sa Panaad Park and Stadium kagab-i, “satisfied” naman sa resulta ang coach sang Yemen Team nga si Abraham Mebratu.
Sa press conference pagkatapos sang hampang, ginpahayag sini nga nangin “very competent” kag “very interesting” ang sambuwa sa tunga sang ila nga team kag sang Philippine Football Team Azkals.
Aminado ini nga naapektuhan sang pagtupa sang mabaskog nga ulan ang performance sang ila nga players.
Apang ang tatlo ka substitutions ang nakapaayo pa gid sang ila nga performance bangud nakalaging sini sang maayo ang iya mga players.
Nalipay naman ang head coach sang Azkals nga si Coach Thomas Dooley sa pagtapos sang sambuwa sa 2-2.
Suno kay Dooley, nakit-an sini nga nakapoy ang Azkals sa biyahe kag mga hampang nga gin-intrahan antes naglupad padulong sa Bacolod apang nangin maayo sa gihapon ang ila mga performance.
Nahibaluan nga antes ang AFC Asian Cup UAE 2019 Qualifiers, halos kada semana may ginaintrahan nga mga torneyo ang mga players sang Azkals sa tagsa nila ka mga teams.
