BACOLOD CITY — Pagahiwaton ang duha ka international football tournaments nga pasakupan sang Philippine Azkals sa probinsiya sang Negros Occidental antes matapos ang tuig 2017.
Ginpahayag ni Provincial Sports Coordinator Angel “Nonong” Verdeflor, sa maabot nga Septyembre magasambuwa ang Azkals kag football team sang Yemen samtang sa bulan naman sang Nobyembre, makaaway sang Philippine football team ang Tajikistan.
Suno kay Verdelor, international standard ang mga pasilidad sang probinsiya rason nga masami ini nagakapilian sa international games.
Dugang pa diri ang tuman kataas nga entusyasmo sang mga Negrense sa sports, ilabi na sa hampang nga football, bangud kun sa iban anga lugar ginahiwat ang hinampang, dyutay lamang ang tumalan-aw apang kun diri sa Negros Occidental, nagalab-ot sa linibo-libo ang nagalantaw kag sa masami, nagagutok ang venue.
Suno kay Verdeflor, ini ang ginatawag nga “Negros Pride” ukon ang pamatasan sang mga taga-Negros nga indi magpasupil.
Samtang, plano sang Provincial Sports Office nga imbetahon ang tanan nga football clubs nga magpasakop sa pagahiwaton nga Governor Alfredo Marañon Jr. Men Open Football League sa madason nga tuig.
Nahibaluan nga sang nagligad nga duha ka semana, opisyal nga ginbuksan ang amo nga hinampang kag suportado ini sang Negros First Sports Office, Negros Occidental Football Association (NOFA) sa idalom ni Ricky Yanson, Visayas Football League sa idalom ni Jimmy Lizares, kag sang provincial government.
Suno kay Verdeflor, ang nagpasakop sa inter-local government unit ukon inter-LGU nga torneyo, nga magatakop sa bulan sang Septyembre, ang nagalab-ot sa 17 ka mga football clubs.
Apang ginpabutyag sini nga indi manegar nga madamo pa sang football clubs sa probinsiya sang Negros Occidental nga luyag man mag-intra kag ang mga ini ang ila target nga imbetaron sa madason nga tuig.
Bangud sini, sa baylo nga inter-LGU, himuon nila ini nga inter-footbal club sa tuig 2018.
Nahibaluan nga ang Governor Alfredo Marañon Jr. Men Open Football League ang bukas sa tanan nga mahuyugon maghampang sang football, bisan ano man ang edad.
