Ginalauman na sang Philippine Coast Guard Northern Negros Occidental ang madamo nga mga pasahero sa mga pantalan subong nga adlaw Easter Sunday tubtob bwas, Abril 1.
Sa interview sang Bombo Radyo Bacolod kay Coast Guard Station Northern Negros Occidental Commander Paterno Belarmino Jr. ginlibot nila ang mga nagkalainlain nga mga sea ports kalakip na ang Escalante Port, Lakawon Island sa Cadiz City kasubong man sa pantalan sa ciudad sang Sagay.
Sa monitoring sang mga ini, gamay lamang ang pasahero nga nagabyahe sang Biyernes Santo tubtob kahapon Sabado de Gloria.
Ginapaabot na ni Belarmino nga magasaka ang numero subong nga adlaw tubtob bwas kun sa diin madamo ang magasulod kag magagwa sa probinsya sang Negros Occidental agud makabalik na sa mga trabaho matapos ang Semana Santa.
Suno diri, nangin matawhay ang assessment sang walo ka Coast Guard substations, samtang nagapadayun pa ang ila pagbantay sa nagkalainlain nga ports sa naaminhan nga bahin sang probinsya.
Ginalantaw sini nga magdeploy sang mga rescue team sa mga coastal areas subong nga Domingo sang Pagkabanhaw bangod ginalauman na nga madamo sang magapadulong sa mga beach resorts agud i-enjoy ang bakasyon.
Dugang pa ni Belarmino nga derektiba man ni Captain Weniel Azcuna, ang District Commander sa Philippine Coast Guard Western Visayas, ang pagseguro sa kahilwayan sa mga coastal areas.
Suno kay Belarmino, sila ang may ginhamtang man nga Malasakit Help Desk sa mga ports, kun sa diin sila ang wala pa sang may namonitor nga mga dalagko nga problema.
Nagapabilin naman ang instruction sa mga coast guard personnel nga alalayan ang mga pasahero partikular na ang mga gikan pa sa malagyo nga mga lugar.
Panawagan man sini sa mga pasahero nga pasulod kag paggwa sa Negros Occidental nga magkooperar sa mga otoridad.
Pasalig sini nga ang Philippine Coast Guard ang magaserbisyo 24/7 sa nagkalainlain nga mga ports sa Negros Occidental.
