BACOLOD CITY — Maayo ang resulta sang una nga adlaw sang pagsabak sang Philippine softball team sa 10th Pacific School Games sa Adelaide, South Australia.
Nahibaluan nga walo sa 12 ka mga softball players ang nagikan sa Negros Occidental, tatlo sa National Capital Region kag isa sa Region 3 samtang ang ila coach naman nga si Roselle Hulleza ang nagikan diri sa probinsya.
Domingo sang aga, gin-atubang sang Philippine team ang host team nga South Australia.
Wala gid naka-score ang kontra tubtub nga natapos ang hampang sa score nga 6-0.
Domingo sang hapon, gin-atubang naman sang Pilipinas ang softball team sang India.
Labi nga ginlampaso sang pungsod ang Indian team bangud natapos ang match sa score nga 16-0.
Lunes sang aga, atubangon naman sang mga ini ang New South Wales kag pagkahapon, magabalik ang Philippine team sa softball field batok sa estado sang Victoria sa Australia.
Ang Pacific School Games ang ginapatigayon sa Adelaide Shores Sports Complex sa West Beach, Adelaide, South Australia kag magatakop sa Disyembre 9.
