BACOLOD CITY-Ginatutukan karun sang Provincial Health Office (PHO) sang Negros Occidental ang apat ka ginasuspetsuhan nga kaso sang tipdas ukon measles sa ciudad sang Kabankalan.
Suno kay Provincial Health Officer Dr. Ernell Tumimbang, ang apat ka suspected nga kaso sang tipdas ang narekord sa Brgy. Camugao sa nasambit nga ciudad kun sa diin duha ang gin-admit sa Lorenzo Zayco District Hospital kag duha man ang nangin outpatient.
Ang mga gin-admit ang ginalakipan sang walo ka bulan nga lapsag kag isa ka 38-anyos nga lalaki samtang ang mga nangin outpatient ang ginalakipan naman sang 22-anyos kag 10-anyos nga mga babaye.
Suno kay Dr. Tumimbang ginkuhaan na sang specimen ang nasambit nga pasyente kag ginpadala sa Metro Manila agud ipaidalom sa laboratory test.
Sa karun nagapatigayon naman ang PHO sang catch-up immunization ukon ang house to house vaccination sa lugar kag padayon man ang ila nga pagmonitor.
Gin-athag naman sang provincial health officer nga wala nakaagi pabakuna ang nasambit nga mga pasyente.
Nahibaluan nga nagdeklarar na ang Department of Health sang outbreak sang measles sa probinsiya sang Negros Oriental.
