Wala nagapabor ang pila ka mga influencers ukon content creator sa pag-promote sang sugal partikular ang online gambling gamit ang ila mga social media platforms.
Sa tunga sang isyu sa actress-vlogger nga si Ivana Alawi nga nagapanagtag sang malahalon nga phones kabaylo sang pag-endorso sang sugal, pila naman ka mga kasubong niya nga mga influencers ang una na nga nagpahayag sang ila pagpamatok diri.
Suno kay Berniecular Vlogs, madamo sang pamaagi para nga makakita sang kwarta kag bisan baliskaron pa ang kalibutan, indi mangin grasya sang Diyos ang kwarta nga naghalin sa sugal.
Samtang, madugay naman nga ginbuyagyag sang influencer nga si Rosmar nga makapila na ini makabaton sang minilyon nga balor sang deal kabaylo sang pag-promote sang sugal apang ginbasura niya ini.
Gin-ako man niya nga nakaagi nga ginkonsiderar niya ang amo nga pinansyal nga oportunidad apang nareyalisar niya nga mahimo pa ini makaguba sang kabuhi sang madamo nga tawo.
