Indi kumpormi ang pila ka mga konsehal nga si Bacolod City Lone District Representative Alfredo “Albee” Benitez ang magpresentar sang loan status sa Development Bank of the Philippines sang iya administrasyon.
Ini kasunod sang official statement sang kongresista kasunod sang nangin tensyon sa tunga nila ni Councilor Homer Bais sa kasagsagan sang Masskara Festival celebration.
Sa interview sang Bombo Radyo Bacolod kay Bacolod City Councilor Wilson “Jun” Gamboa, kumpormi ini sa pagduso sang transparency, accountability, kag good governance nga rasun ni Benitez sa personal nga pagpresentar sang mga datos.
Suno sa konsehal, sarang gid ini nga himuon sang kongresista, apang pahanumdom man niya nga sa bureaucracy, ang presentasyon sang mga datos ang yara sa gahom sang executive department.
Pahanumdom niya nga yara sa legislative department si Benitez, kasubong man bisan sila nga mga konsehal.
Gani para kay Gamboa, matawag sini nga red tape ang pagduso sang komitiba sa City Council nga maglabay pa sa ila ang report.
Suno diri, ang dapat nga magsumiter sang report amo ang Local Finance Committees nga ginalakipan sang Treasury Committee, Finance Committee, City Planning Committee kag Accounting Committee.
Panawagan na lamang niya nga indi lamang sa mga komitiba sa konseho ipadala ang report, kundi dapat nga sa tanan nga konsehal ang mahatagan sang kopya.
