Ginkumpirmar sang presidente sang Bacolod Alliance for Commuters Operators and Drivers (Bacod) Inc. nga may yara sang patigayunon nga untat biyahe ang mga traditional jeepneys sa ciudad sang Bacolod subong nga adlaw bilang pag-upod sa MANIBELA kag PISTON agud balabagan ang PUV Modernization Program.
Sa interview sang Bombo Radyo Bacolod kay Rudy Catedral, magabiyahe pa ang mga traditional jeepneys subong nga aga apang karun alas 2:00 ang takna sa hapon may yara sang caravan.
Suno kay Catedral, 500 ka mga traditional jeepneys sa ciudad sang Bacolod kag probinsya sang Negros Occidental ang magaupod sa caravan nga ila patigayunon.
Suno kay Catedral magluwas sa caravan, may yara sila sang patigayunon nga programa sa Bacolod City Old Airport.
Suno diri, magaupod sila sa untat-biyahe agud nga mapakita sa local government unit kasubong man ang national nga gobyerno nga madamo ang apektado sang nasambit nga programa sa ciudad sang Bacolod.
Suno diri, indi sila magpaconsolidate bangud ang luyag sang mga ini nga mabalik ang lima katuig nila nga prangkisa.
Suno pa kay Catedral, indi sila magpaconsolidate bangud bankrupt lamang ang ila madangtan kag nakita man nila nga madamo na ang nagback out nga una nga nagpaconsolidate.
Ginpahayag man sini nga ang patigayunon nila nga protesta ang una pa lang bangud masundan pa ini tubtob nga mangin madilag-on ang ila nga kampanya batok sa PUV Modernization Program sang gobyerno.
