Ma-extend man ukon indi ang termino, fullfilled na ang Punong Barangay sang Barangay Vista Alegre, Bacolod City bangod ini na ang iya nga last term.
Madumduman nga ginpirmahan na ni President Ferdinand “Bongbong” Marcos Jr. ang Republic Act 12232 nga naga-extend sang term of office sang Barangay and Sangguniang Kabataan officials sang apat ka tuig kada termino samtang ginapostpone man ang Barangay and Sangguniang Kabataan Elections sa Nobyembre 2026, gikan sa orihinal nga schedule nga Disyembre 2025.
Sa interview sang Bombo Radyo Bacolod kay Punong Barangay Lindy de Leon, nagapati ini nga kalabanan sa mga sitting officials nga magapapili pa sa masunod nga termino ang pabor sa layi, samtang magapamatok naman ang mga nagahandom sang pwesto.
Kumpormi man ini nga unfair para sa mga bag-o lang nagpungko nga Barangay Officials kun duha lamang ka tuig ang ila termino bangod sa mga nagliligad nga postponement.
Para kay De Leon, wala ini sang problema madayun man ukon indi ang term-extension bangod siya ang magagradwar naman.
Dugang pa sini nga siya ang fullfilled naman sa iya pagserbisyo.
Kun sa diin sa umpisa pa lamang, ginapahanumdom na sini nga siya ang muchacho lamang sang pumuluyo sa Barangay.
Kag bangod siya ang ginpili sang tawo sa pwesto, ginapili man sini nga ihatag ang iya 100 percent sa pagserbisyo.
Suno kay De Leon, sa edad nga 61 anyos, wala na ini sang plano nga magpapili pa sa iban nga pwesto sa masunod nga piniliay.
Ini bangod sang magserbi nga kapitan, nadulaan ini sang oras sa iya pamilya bangod mas ginapili sini nga magserbisyo, kag limitado lamang ang leave nga iya gina-avail.
Bangod sini, nagasunggod naman ang iya mga kautoran bangod ini ang masami nga wala sa ila nga mga pagtililipon.
