Anom ka mga pumuluyo sa Purok Ilaya, Barangay Cabug, Bacolod City kalakip ang ila incumbent Purok Chairman ang nagdangop sa Bombo Radyo Bacolod agud ireklamo ang anomalya sa ila eleksyon sa Purok nga patigayunon bwas, Marso 3.
Sa interview sang Bombo Radyo Bacolod kay Manuel Lachica, incumbent Purok Chairman sa Purok Ilaya, ginakwestyon sang mga ini ang pagdayun sang eleksyon bwas, nga maga-umpisa alas-8:00 sa aga kag magatakop alas-2:00 sa hapon apisar nga wala pa sila nagkasugot kag nakapirma sa numero sang inclusion kag exclusion.
Suno kay Lachica, imbes nga mga Barangay Officials, siya kag ang makasumpong sini nga si Ramon Jarme ang ginmanduan nga magpatigayon sang survey agud matumod ang mga qualified voters.
Indi kaangay sa mga registered voter’s sa Commission on Election (COMELEC), nalakip sa ila listahan bisan ang mga indi rehistrado sa Comelec apang anom ka bulan na nga nagapuyo sa lugar.
Bangod sila ang separado nga nagpatigayon sang survey, may ginapatigayon nga inclusion kag exclusion, kun sa diin gina-ekisan ang indi nila botante gikan sa listahan sang kasumpong.
Ang survey ang ginpatigayon humalin Pebrero 22 kag naglawig sang lima ka adlaw, apang sa ila nga survey, si Lachica ang nakatipon sang 572 nga pangalan, samtang 407 lamang ang kay Jarme.
Suno kay Lachica, wala nagpatigayon sang kumpleto nga survey si Jarme kag madamo sang mga pumuluyo nga wala sa listahan sini gani indi makaboto sa bwas nga eleksyon.
Panindugan sini nga luyag lamang niya nga mahatagan sang kinamatarong ang mga residente nga sila ang makapili sang Purok Chairman.
