Liwat nga nangin sentro sang kontrobersiya ang Senado matapos magbinaisay ang majority kag minority bloc angot sa isa ka video nga ginpakita ni Senator Imee Marcos kahapon sa plenaryo.
Gin-akusaran sa video sanday former Senate President Vicente Sotto III kag House Speaker Faustino “Bodjie” Dy nga may plano nga Charter Change agud punggan si Vice President Sara Duterte sa 2028 elections.
Bangud sini, ginpakigbato ni Senator Juan Miguel Zubiri nga kakason ang video sa opisyal nga rekord sang Senado kag gintawag ini nga rason kun ngaa ginalaragway sang publiko ang senado bilang “circus”.
Suportado ini sang pila ka senador kalakip sanday Tito Sotto, Ping Lacson, kag ang mag-utod nga Tulfo.
Ginpanginwala naman ni Sotto ang mga alegasyon kag ginpahayag nga simple lamang nga paghinun-anon ang ila ginapatigayon kag indi natuhoy sa “No Elections” ukon term extension.
Sa ulihi, nagpasugot si Sen. Imee Marcos nga bawion ang video agud malikawan ang mas malala nga tensyon sa Senado.
