Nagalaom ang napulo ka taxi drivers sa Talisay City nga sila ang mahatagan sang fuel subsidy bangod sila ang wala gid nakabatun humalin sang ginlunsyar ang programa.
Nagdangop na sa Ipa-Bombo Ta segment sang Bombo Radyo Bacolod si Andres Panibawan, nagserbe nga representative sang grupo bangod makapila na nila nga ginfolow-up ang request apang tubtob sa karun wala gid nakaabot.
Suno diri, sila ang wala gid nakabayun sang fuel subsidy gikan sa Department of Social Welfare and Development (DSWD) kag Land Transportation Franchising and Regulatory Board (LTFRB).
10 lamang ang nagdangop sa Bombo Radyo, apang suno kay Panibawan kapin 50 ang Taxi units sang ila operator kag bisan isa ang wala gid sang may nakabatun.
Sila ang nagabyahe sa Silay City kag Talisay City nga routa.
Suno diri, naghatag naman sila sang mga kinahanglan nga dokumento nga ginpangayo sang LTFRB, kalakip na ang gcash account nga ginpahayag pasudlan sang ayuda.
Pahayag sini nga may iban sa ila ang nagpangutang na kag ang ayuda kuntani ang ginasaligan nga ibayad.
Si Panibawan ang kapin 40 ka tuig na nga taxi driver.
