Luyag sang pila ka transport groups nga mahibaluan kun pila ang kantidad nga napain para sa Negros Occidental para sa P10,000 nga fuel subsidy nga ginahatag sang Land Transportation Franchising and Regulatory Board sa modernized kag traditional jeepneys.
Sa interview sang Bombo Radyo kay Albert Villanueva, chairman sang Sentrong Samahan ng mga Tsuper at Operators – Negros, maayo ang Pantawid Pasada Program sang national government apang mas maayo pa gid ini kun patas ang hatagay kag indi base sa bracket bangud palareho man lang nga nagapatughong sang fuel.
Suno kay Villanueva, operator ang nagabaton sang P10,000 subsidy para sa modernized jeepney samtang mahimo nga 50-50 naman ang operator kag driver para sa traditional jeepney.
Kun modernized jeepney suno sa iya, ang operator gid ang makapulos sang bilog nga P10,000 gani ila nga ginakwestyon.
Luyag man nila mahibaluan kun pila ang kantidad nga na-allocate para sa ciudad sang Bacolod kag bilog nga probinsya sang Negros Occidental.
Sigurado nga makabaton ang nagauyat sang legitimate documents ilabi na sang prangkisa apang sarang naman maka-apply sa LTFRB kag Land Bank ang wala pa sang Pantawid Pasada Program card.
Suno kay Villanueva, luyag nila nga makita ang listahan sang LTFRB kun sanday sin-o ang makabaton sang subsidy agud mahibaluan kun pila ang modernized jeepneys kag pila ang traditional jeepneys kag masiguro nga ang nagabyahe lang ang makabaton.
Kun madamo ang units sang modernized jeepney sang isa ka operator suno kay Villanueva kag makuha sini ang 100 porsyento sang fuel subsidy, dako nga kantidad ang mabaton sini. Samtang, para sa secretary general sang United Negros Drivers and Operators Center (UNDOC), may diskriminasyon sa pagpanagtag sang fuel subsidy nga P10,000 para sa modernized jeepney kag modernized UV express samtang P6,500 naman sa traditional jeepneys.
Sa interview sang Bombo Radyo Bacolod kay Diego Malacad, wala man sang kinalain sa modernized kag traditional nga parehas man nga mga pubic utility vehicle.
Suno diri, kun sayuron mas dako ang income sang modernized kumpara sa traditional gani tani ginkaangay man ang paghatag sang subsidy.
Pahayag ni Malacad, wala na-specify sa memorandum circular nga lain ang ihatag nga balor sa modernized kag lain man sa tradtional.
Kag amo nga ginkwestyon sini kun sa diin nakabase ang LTFRB -Region 6 sa kun pila ang ipanagtag nga subsidy.
Nagapangabay man ini sang athag nga rules and regulations agud wala sang away nga magluntad sa tunga sang operators kag draybers ini kasunod sa pahayag sang LTFRB nga operators lamang ang makabaton sang subsidy kag ini indi magdiritso sa drivers.
Nagpanugyan ini sa LTFRB, Land Transportation Office, kag transport groups nga pungkuan kag sturyahan ang ini nga problema agud masolusyonan.
