Padayon ang preparasyon sang Pilipinas para sa FIFA Futsal Women’s World Cup nga patigayonon sa Nobyembre 21 tubtob Disyembre 7 sa PhilSports Arena sa Pasig kag Victorias City Coliseum sa Negros Occidental.
Suno kay Philippine Football Federation president John Gutierrez, padayon ang preparasyon sang Local Organizing Committee agud masiguro nga madinalag-on ang pag-host sang Pilipinas para sa dako nga event.
16 tanan ka pungsod kalakip na ang Pilipinas ang magapartisipar sa nasambit nga event.
Ang mga teams nga mapadulong diri amo ang gikan sa Spain, Italy, Poland kag Portugal halin sa Europe; Japan kag Thailand halin sa Asia; Morocco kag Tanzania halin sa Africa; Argentina, Brazil kag Colombia halin sa South America, Canada kag Panama halin sa North America; kag New Zealand halin sa Oceania.
Antes ang event, ang Filipinas magabyahe padulong sa Japan sa masunod nga bulan para sa training camp kag posible sa Europe para sa FIFA window sa Oktubre.
Ang official draw ceremony pagahiwaton sa Setyembre 15 sa BGC Arts Center.
