Nagapati ang isa ka Pinoy ship captain nga dapat silutan ang kapitan sang Chinese vessel nga nagbunggo sa Pinoy fishing boat sa Recto Bank sa West Philippine Sea sa baylo nga baisan pa kun intentional ukon accidental ang insidente.
Sa interview sang Bombo Radyo Bacolod kay Capt. Edgardo Flores, consultant sang United Filipino Seafarers, madugay pa nga debate ang kinahanglan kun hungod ukon aksidente ang natabo bangud sarang makarason ang kapitan nga wala sang suga ang fishing vessel gani wala ini natalupangdan.
Ang amo nga kaso suno kay Flores ang dapat nga idangop sa international court para sa imbestigasyon.
Kun ‘debatable’ man ang insidente suno sa iya, tuman naman kaathag ang bayolasyon sang Chinese ship captain bangud sa pag-abandonar sa mga Pinoy fishermen.
Sa idalom sang Regulation 33 sang SOLAS Convention ukon International Convention for the Safety of Life at Sea nga ginratify sang Pilipinas, dapat nga irescue ang mga crew sang nabungguan nga barko ukon ang distressed
Suno kay Flores, inhuman ang ginhimo sang Chinese captain bangud ginbayaan nila ang mga Pinoy bisan nakahibalo ang mga ini nga delikado ang kabuhi sang mga mangingisda kag mahimo nga mapatay.
Ang abandonment suno sa ship captain ang isa ka krimen kag dako ang silot batok sa master of the ship.
Sa idalom sang Regulation 33 sang SOLAS, gilayon man nga nagarescue ang barko nga pinakamalapit sa ginahamtangan sang distressed ship.
