Nagpasalig ang pinuno sang 303rd Brigade Commander sang Philippine Army nga padayon kag maayo ang komunikasyon sang mga katapo sang Philippine National Police kag Philippine Army sa Negros Occidental.
Madumduman nga apat ka mga suldado ang napatay sang mga pulis sa isa ka checkpoint operation sa Sitio Marina, Barangay Walled City, Jolo, Sulu sang Lunes, alas-2:45 sang hapon.
Nahibaluan nga yara sa opisyal nga misyon ang mga suldado nga naka assign sa 11th Infantry Division sang Philippine Army.
Ang mga napatay amo ang isa ka Major, isa ka Captain, isa ka Sarhento kag isa ka Corporal.
Suno kay PNP BARMM Spokesperson P/Maj. Jemar Delos Santos, natalupangdan sang mga pulis ang isa ka SUV montero nga nagadu-ag sang gray nga may sakay nga apat ka armado nga kalalakin-an.
Ginpalapitan nila ang mga ini nga nagpakilala naman nga mga miyembro sang Armed Forces of the Philippines kag ginhambalan sila nga gilayon nga magderetso sa Jolo Municipal Police Station para sa verification.
Apang sa baylo nga magpati kag magpadulong sa Jolo Police Station, nagpalagyo ang mga suldado padulong sa direksyon sang Martirez, Barangay San Raymundo, Jolo, Sulu rason nga didto nagluntad ang engkwentro nga nangin rason ang kamatayon sang mga suldado.
Nagpangabay naman si Western Mindanao Command (Wesmincom) Commander Lt. Gen. Cirilito Sobejana nga imbestigahan sang National Bureau of Investigation (NBI) ang insidente.// Sa interview sang Bombo Radyo kay Colonel Inocencio Pasaporte, ginpahayag sini nga nagacoordinate ang PNP kag Philippine Army sa Negros kag kun may yara sila sang mga operasyon, ila ginapahibalo ang isa kag isa.
Suno kay Inocencio, isa sa mga guidelines sa mga batallion commanders ang makig-angot sa mga chief of police.
Nagapatigayon man sila sang regular meetings kag conferences agud malikawan ang nagakaangay nga insidente.
Suno sa pinuno, hulton nalang anay nila ang resulta sang imbestigasyon sang NBI agud mahibaluan man kun sin-o ang may sala kag kun ano ang mga tikang nga nagakadapat himuon.
Nagpang-abiso man ini sa mga kaangay nga suldado nga magpabilin nga kalmado kag mintinaron ang maayo nga relasyon sa mga kapulisan.
